عقيد ركن معاش عائد الملك يكتب : الإحتراف {١}

السودان

الخرطوم : الراية نيوز

عقيد ركن معاش عائد الملك يكتب :

 الإحتراف {١}

هو الفعل الوحيد الذي جعلنى في غنى عن أي إنتماء او إلتزام خلال ممارستي لمهنة حماية اهم شخصية فى البلاد مررنا خلالها بكثير من المواقف ساقوم بسردها إن إتسع لي صدركم والزمن.

مكالمة من دفعتى ات وين.. قلت ليه انا فى النادي فى الحاج يوسف..بتعمل شنو .. يعنى بعمل شنو ما قاعد ألعب فى الكتشينة قال لي بالغت والله.. انحنا كلنا فى رويال كير .. الليلة ما عملية السيد الرئيس.. فقدتك قلت اضرب ليك تجي .. قلت ليه يا دفعة هى شغلتنا دي احتراف ولا حَوار قال لي كيف يعنى .. قلت ليه كان شغلتنا شغلة حَوار من دربي بربط بطني بشال وبجى بمسك كراع السرير واقعد .. ولو شغلة احتراف انا الليلة ما شغال شيتا يجيبني ليكم ماف .. برضو السيد الرئيس عندو برنامج قيام ليل فى مسجد حي المطار شهري الزول الشغال في اليوم دا الزملاء كانو بيقولو ليه ادعو لينا معاك المهم لو صادف يومي صراحة ما كنت بخش معاهم صلاة القيام كنت بوزع ناسي جوة وحول الجامع وبلف عليهم لحدى ما تجي اللقيمات يختو لي حقى بقعد اضربو بشاييهم المقنن والسيد الرئيس زول ما بدخل نفسو فى التفاصيل زول بالجد كبير ربنا يحفظو اها يوم بعد ما انتهي القيام وركب ومتحركيين قال لي والله اجر القيام عظيم خلاص عرفت هو قاصدنى قلت ليه والله يا سعادتك اجر الرباط أعظم قال لي صدقت . وذات مرة شغال مناوب معاه جاهو خبر انو خالو توفي لرحمة الله بالعصر طوالي اتحركنا للمقابر ومنه لبيت خالو لحدي نص الليل ورجعنا ….الصباح بعد الصلاة كنا بنذكرو بالبرنامج وعند السلام عليه قلت ليهو احسن الله عزاءكم فى خالك قال لي يادوب قلت ليه والله يا سيادتك امبارح كلو انا بى وراك شغال يادوب الليلة جيت بقدام قلت استغل الفرصة نعزيك فضحك .
عقيد ركن معاش عائد الملك

تعليق 1
  1. […] عقيد ركن معاش عائد الملك الإحتراف {١} […]

اترك رد