عقيد ركن معاش عائد الملك يكتب : الإحتراف {٢}

السودان

الخرطوم : الراية نيوز

عقيد ركن معاش عائد الملك يكتب :

الإحتراف {٢}

هو الفعل الوحيد الذي جعلنى في غنى عن أي إنتماء او إلتزام خلال ممارستي لمهنة حماية اهم شخصية فى البلاد مررنا خلالها بكثير من المواقف ساقوم بسردها إن إتسع لي صدركم والزمن ..

جرت العادة فى رمضان ان الضابط المناوب بيفطر مع السيد الرئيس …الكلام دا ما كان واقع لي فلا يمكن أن تجعل البساط احمدي مع الشخصية الهامة لدرجة تاكل معاه وكنت بعتبرها انتقاص للاحترافية التى أؤمن بها وكل مرة يرسل لي للإفطار بعتذر بعذر .. يوم طلع من الجامع بعد المغرب ناداني قال انا عارف ات ما عايز تفطر معاي فى البيت ليه .. طوالي قال نادو لي بتاع الضيافة لمن جاهو قال ليهو من الليلة دى تعليمات يوم عائد الدنقلاوي دا يكون شغال فى الإفطار بدل العصيدة تعملو قراصة عشان يفطر معاي 😂 . ..

وفى المزرعة يوم السبت كان الضابط المناوب بيتغدا معاه انا برضو .. ما كنت بمشي او بعتذر باي عذر اها يوم أصر انو انا اجي اتغدا معاه قلت لبتاع الضيافة قول ليهو قال هو صايم بعد شوية جا طالع قال لي الغدا معاي عفيتك منو هسع بس ورينى الفقه البخليك تصوم يوم السبت 🤔 قلت ليه دا فقه دناقلة ساي يا سيادتك ضحك وقال لي دناقله يا رسول الله .

ومرة مشينا أثيوبيا الخميس المساء والطيارة صغيرة الإمام ما جا معانا اها فى مسجد بيت الضيافة باريس أبابا وفى صلاة الصبح السيد الرئيس قدم الياور صلى بينا وبعد السلام عادتى ما بنتظر التسبيح والدعاء طوالى بطلع اشوف شغلى اها فى اليوم داك اتشاورو منو حيصلي بيهم الجمعة طوالى دفعتى حسن خالد حبه يمقلبنى قال ليهم دى محلولة عائد ممكن يصلى بينا الجمعة الرئيس قال تمام وين عائد بس جانى الحكمدار جارى السيد الرئيس عايزك لمن مشيت قال لى اتفقنا انك تصلي بينا الجمعة جهز خطبتك ..🙄 طوالى عاينت لدفعتي حسن ضحك وعاين لتحت عرفتو مقلبنى قمت قلت للسيد الرئيس يعنى يا سيادتك بقيتونى شيخكم وإمامكم قال ودي فيها كلام اكيد قلت يعنى بتمشو بالفقه بتاعي قال موافقين قلت ليه طيب نحنا على سفر يا سيادتك وبالتالي ما علينا صلاة جمعة ياها الركعتين جمع تقديم مع العصر وسرية كمان بصلي بيكم عادى .. ضحك وقال لي مع انو فقهك هنا اخير من فقه صيام السبت لكن عفيناك تب 😂 اها شلتها صرة وخيط لدفعتى ودفنتها ليهو رجعتنا كان عندنا دورة متقدمة انا وهو .. وفى الافتتاح كان قاعد وزير الدفاع وهيئة الأركان ومدير جامعة الخرطوم جانى بتاع التوجيه المعنوي هو رائد جديد وانا مطرف قال لي يا سيادتك داير واحد من الدارسين يقرأ القرآن عاينت لحسن لقيتو منهمك شغال واتساب طوالى قلت ليه جدا بقرأ انا القران قال لي معليش يا سيادتك بس اسمك طوالى قلت ليه مقدم ركن حسن خالد حاج الحسن و مع الافتتاح قال الان مع آيات من الذكر الحكيم يتلوها على مسامعنا الدارس مقدم ركن حسن خالد زولي اتهجم وعاين لي قلت ليه اول امس بقيتنى امام وانا الليلة بقيتك مقرئ فشنو اتحرك سريع وخلص بالإخلاص لانها ثلث القرآن.. 😁ما بسيب حقي عشرة مرات 😂😂😂

عقيد ركن معاش عائد الملك الإحتراف {١}

تعليق 1
  1. […] عقيد ركن معاش عائد الملك الإحتراف […]

اترك رد