استنكار ورفض شعبي واسع لحديث عبدالرحيم دقلو ووصفه بالعنصري

الخرطوم: الرآية نيوز

لاقت تصريحات نائب قائد قوات الدعم السريع، الفريق عبدالرحيم دقلو،  استنكارا واسعاً، واتهم بتأجيج الصراع العنصري و إثارة أهل الشمال.

و قال عبد الرحيم دقلو في احتفال قبيلة المحاميد بمناسبة إطلاق سراح زعيمها الشيخ موسي هلال (الخرطوم حقت ابو منو ) واضاف لو علي انا تمشي مروي، نكرمهم، فيها مطار ومستشفي محل التنمية).في اشارة لشمال السودان وتعزيز فكرة الهامش والمركز وما يروج عن ظلم أهل الشمال لباقي مناطق السودان .

وهو ما وجد استنكارا واسعا في الوسائط لعدة اسباب أولا رفض وجود الحركات والقوات النظامية في الخرطوم العاصمة يمثل مهدد أمني للمواطنيين وخصوصا من تصرفات بعض عناصرها مثل اغتيال بهاء نوري، من قبل افراد من الدعم السريع. واحتلال دار اللجنة الاولمبية من قبل قوات مناوي، وبعض الحوادث مثل تفجيرات مواقع عسكرية والذين يرفضون ذلك هم أهل الخرطوم من كل انحاء السودان ولكن دقلو حاول ان يروج إلى ان الذين يرفضون ذلك هم أهل الشمال .

و كتب الصحفي محمد حامد جمعة (كل أبناء دارفور ؛ ممن لهم وعي عليهم الوقوف بقوة لصالح خطاب يحفظ مقامات كل الجهات . ظلم تاريخي بتاع الساعة كم ؛ دارفور من فجر الاستقلال لليوم حضورها في كل الحقب معقول، كون ان ابناء الإقليم قصروا في تنمية مناطقهم وتجسير الهوة بين المجتمعات المحلية واي زول إستخدم اهله درقة ورافعة دي ما مشكلة باقي السودان .

وأضاف نوار : ما تمسحو الدهن في الصوف بالله، القروش العند اثرياء دارفور ممكن تحول اي مدينة لجنة ديات القتلي كان ممكن تحول جنوب دارفور او شمالها حضر وريف في نطاقات الزول من مزرعة ومراح بياكل للحول الا لو اشترى سكر وشاي.

وزاد : والله انا زرت نوري القريبة دي شفت جالوص متهالك _ في طريقي لسد مروي _ احترت الناس دي بتكتب شعر لشنو وكيف . صي وقفر . والبلقى مال او سلطة ببني ليه مستشفى ومقر خدمة . في دارفور في والي جاب مولد في صليعة ولا ياسن ما عارف جات جماعة مسلحة كسرتو بقذيفة اربجي . تقول البشير بتعالج فيه . وما معمول لاهلهم . ياخ ما تقرفونا) واضاف (فاتو مروي بهناك وماف زول سال زول
ماف زول ضد الحركات المسلحة، لكن كمان من حق الناس تبدي قلقها من وصول حشود قواتها بسلاحها كامل عتاد حربي.

وتابع: اي زول مدني خليك من عسكري بفهم انه في مواقيت الاتفاقيات اي فصيل مسلح عنده نقاط تجميع وحصر أسلحة وبيكون في تمثيل رمزي اغلبه خاص بالحمايات الشخصية، ولاحظ انه الحركات دي ما خضعت لبرنامج تنفيس وخاشة الخرطوم بذهنية انها مهمشة وان العمران والمال الفي الخرطوم دا حقهم لان الناس دي حرامية واكلت حق اخوانها، دا ما فيه تمييز بين غني بجهده ولا زول سلفقة . طيب لو بكره في جماعة او صنف وعدوهم بضباط وعلامات وما تم الكلام دا والمجموعة دي زعلت وتمردت وتحت يدها سلاح ممكن يدك عمارة او مدرسة ! ساي زعلة كدا الناس تقول يا منو ؟
القصص دي ما فيها حسن نوايا ومطيابات ويفترض الجهة الرتبت الاتفاق دا تكون واضحة كان جسم مدني ولا عسكري . الاوله شرط اخر نور . ولغاية دا ما يحصل اي زووول من حقه يتخوف ويقلق . وقصة يمشو اي محل في السودان اي سوداني يمش . دي ما حاجة عاوزة تنويه . مما الله خلقنا في دارفور لاقينا كل أجناس الارض . نيالا البحير الدناقلة الفيها في حفير مشو مافي . والدارفوريين ديل انا شفتهم عمودية مع الناظر ترك وساكنين في اقصى الفشقة خلفهم اثيوبيا وفيهم الوصل قندر ووصلوا الشمال لحدود حلفا خلي مروي. يوم واااحد في زول سال زول ؟! لان الناس عايشة ومتعايشة بربطهم عرف وبجمع خلق سودانيين ما عاوز كشاف ذاتو).

وكتبت الصحفية رشان أوشي (ماذا يقصد دقلو بمروي والإشارة إليها.. حديث عنصري تافه جدا..)

ويدور حديث في الصوالين الخاصة ان عبدالرحيم دقلو يقود خط عنصري لتوحيد الحركات الدارفورية ضد الشمال، ويصرح به لخاصته ويعضد ذلك تصريحاته الأخيرة في احتفالية موسى هلال.